أخر الاخبار

إزاي تعرف إن حد عاملك بلوك على الواتساب

إزاي تعرف إن حد عاملك بلوك على الواتساب


أول مرة من ساعة ما بدأت كتابة أكتب موضوع بالطريقة العامية بدون استخدام اللغة العربية الفصحى في الكتابة ، مع إيماني الشديد إن حتى لو الناس بتحب البساطة إلا إن تنازلنا عن الكتابة باللغة العربية مش ممكن يبقى حاجة كويسة ، ولكن الموضوع ده لازم اكتبه كأني بتكلم معاكم في كافيه أو قاعدين بنلعب دور استيميشن في لمة أصحاب.



فكرة الموضوع جاتلي من وجود تعقيد في علاقات الناس مؤخرا بعد استخدام التكنولوجيا وخصوصا الموبايل معظم أوقات يومنا ، وتقريبا مفيش حد معاه تليفون حديث إلا وعنده برنامج واتساب ، ناس كتير بتخسر بعض بسبب التكنولوجيا سواء شات على واتس أو فايبر أو حوار في سياسة أو دين على الفيسبوك ينتهي بإنك ممكن تخسر صاحبك بكليكة ماوس وتعمله بلوك.



عمرك شكيت إن في حد عاملك بلوك على الواتساب ومش عايز يعرفك تاني ؟

علشان الشك يزول باليقين هقولك مجموعة حاجات تخليك تعرف إذا كان حد عاملك بلوك على الواتساب ، مش شرط إن واحدة فيهم بتحصل يبقى الشخص اللي ع الناحية التانية عاملك بلوك ، بس لو كذا واحدة من العلامات دي اتجمعت مع بعض فده بيكون مصوغ قوي إنك تعتقد إن الشخص ده عاملك بلوم وغالبا مش عايز يكلمك أو يعرفك تاني.




خليك فاكر إنك لازم تتأكد قبل ما تظن إن حد عاملك بلوك على الواتساب ، ومن فضلك اقرأ الموضوع كامل علشان ما تظلمش حد J وخليك فاكر إننا جايين نهدي النفوس



إزاي تعرف إن حد عاملك بلوك على الواتساب؟
قبل ما أقولكم على الحاجات اللي تقدر تعرف بيها إن حد عاملك بلوك أو لأ ، لازم الأول نعرف الواتساب بيشتغل إزاي ، وإيه هي المراحل اللي الرسالة بتمر بيها من أول ما بتكتبها لحد ما توصل والشخص التاني يقراها.

بص يا سيدي وبصي يا ستي

أول ما بتكتب رسالة وتبعتها الواتس بيحط علامة صح جنب الرسالة من تحت كدة وده معناه إن الرسالة طلعت فعلا من التليفون بتاعك على الشبكة ، وبعد شوية تلاقي علامة صح تانية ظهرت جنب العلامة الأولى اللي بالمناسبة لونها رصاصي ، وعلامة الصح التانية دي معناها إن الرسالة وصلت تليفون الشخص اللي إنت بتبعتله الرسالة ، وأول ما الشخص ده يقرأ الرسالة دي تلاحظ إن علامتين الصح اتحول لونهم للأزرق وبكدة تكون إتأكدت إن رسالتك وصلت للطرف التاني وشافها.

دي طريقة عمل الواتساب وعلشان تبقى عامل حسابك إن الواتس عمره ما هيقولهالك صريحة كدة إن حد عاملك بلوك وده لمسائل قانونية متعلقة باتفاقية المستخدم والخصوصية اللي عاملها الواتس وده لأنهم في بلاد برة بيهتموا بالحاجات دي مش زي عندنا :D.



يلا بين نخش في الموضوع

العلامات اللي تعرف بيها إن حد عاملك بلوك على برنامج Whatsapp:
1- أول علامة تعرف بيها إن حد عاملك بلوك ولا لأ ، إنك تبص آخر مرة كان أونلاين إمتى ، في الغالب لما بتفتح شات مع أي حد بيظهر فوق تحت اسمه وصورته آخر مرة كان فيها أونلاين إمتى ، ولكن لو الشخص ده عاملك بلوك وش مش هتشوف آخر مرة كان فيها أونلاين إمتى.

بس خد بالك مش بالضرورة إنه يبقى عاملك بلوك لو آخر ظهور مش باين ، لأن زي ما انتوا عارفين بقى عادي من الإعدادات إنك تلغي آخر ظهور ليك عن كل الناس ، فاستنى شوية ما تحكمش من النقطة دي بس ، ويلا بينا نشوف العلامة التانية لعل وعسى ^_^.



2- شوف علامات الصح اللي بتظهر مع الرسايل ، فاكر من شوية لما اتكلمنا على طريقة عمل الواتساب وقلنا إن علامة وصول الرسالة للطرف المستلم هي إن الرسالة يكون جنبها علامتين صح ، لو لاقيت علامة صح واحدة على طول الخط ومعظم الوقت يبقى الرسالة مش بتوصل للطرف التاني ، وده معناه إنه احتمال ( بقول احتمال ) إن الشخص ده عاملك بلوك.

بس بردو مش شرط ، لأنه ممكن يكون الداتا عنده فاصلة وباقة النت خلصانة وبالتالي هيفضل أوفلاين وقت طويل والعلامة التانية مش هتظهر جنب الرسالة ، فخلينا نخش على العلامة الثالثة ، لعل وعسى لسه في أمل 😀 .



3- رن عليه ، أيوة رن عليه من الواتساب وشوف المكالمة هترن وهتكمل ولا لأ ، لأن في الغالب لو الشخص ده عاملك بلوك مفيش ولا مكالمة هتعدي ، بس بردو مش هنسيء الظن ونقول ممكن يكون أوفلاين أو في مشكلة في تليفونه أو غير الرقم !! هو مستبعد بس خلينا نبص على اللي بعده.



4- بص كدة على صورة البروفايل ، اتغيرت ؟ اختفت ؟ بقت الصورة اللي إنت معينهاله عندك في قائمة الأسماء .. لو الصورة فضلت مدة طويلة مش بتتغير أو اختفت فجأة وبقى مكانها فاضي فدي علامة قوية إن الشخص ده عاملك بلوك ومش عايز يعرفك مرة تانية.

زي ما قلت في أول الموضوع إن مش شرط وجود علامة من اللي فاتوا إن الشخص ده عاملك بلوك ولكن وجودهم مجتمعين أو أكتر من واحدة مع بعض فده دليل قوي على إنه معمولك بلوك ، بس في طريقة تقدر تقطع بيها الشك وهي إنك تستخدم موبايل تاني برقم تاني وتشوف الشخص ده هل بيظهر آخر مرة كان أونلاين إمتى ولا لأ ، وهل الرسايل بتوصل عنده وبيستقبل مكالمات واتس أو لأ وأخيرا هل صورة البروفايل زي ما هي ولا بتتغير واليقين ساعتها هيكون الشخص ده مش عايزك في حياته أو إنه ما زال محتفظ بيك بس ظروفه ملخبطة.

الطريقة الأسهل:
والطريقة الأسهل من وجع القلب اللي فوق ده كله إنك ترفع سماعة التليفون وتتصل بيه أو تقابله وتسأله وساعتها هيقولهالك صراحة إذا كان عاملك بلوك وساعتها مفيش مكان لكلام ، أو هيبدأ يتحجج ويحاول يقنعك إنه مش عامل بلوك وتقضوها سوا والأمور هتمشي عادي وفضلنا أصحاب وحبايب بس ملوش لازمة الواتس ، وممكن احتمال كبير إنه النت عنده وحش وإنت كنت ظالمه في ظنك وشكلك ساعتها هيبقى بايخ أوووووووووي وأنا مليش دعوة ومن فضلك ما تدعيش :D.



لو الموضوع عجبك ما تبخلش عليا بتعليق إيجابي ، ولو عندك أفكار تانية سيبها في التعليقات وهبقى أضيفها للموضوع.




حجم الخط
+
16
-
تباعد السطور
+
2
-